تحذير

تحذير : هذه المدونة تخضع لقانون حماية حقوق الملكية الفكرية ونحذر من نشر أو نقل أي نص أو مقال للكاتبة.. دون نسبه للمؤلفة.. في أي وسيلة

انا قولتلكوا اهوا ... محدش ياخد فى ايده حاجه وهوا طالع ويعمل نفسه مش واخد باله
سيبوا كل حاجه مكانها

نورتنــــــــا

نورتنـــــــــا...........

نورت مدونتى الى هيا مدونتك .... ماهو همى هوا همك .... وجرحى هوا جرحك
وفرحى برضه فرحك
مصرى او سعودى...... اماراتى او لبنانى .... خليجى او تونسى
مش برضه عربى زينا
محلاوى ولا بحراوى .... شرقاوى أو اسمعلاوى .... اسكندرانى أو قهراوى
مش برضه مصرى زينا
أهلاوى ولا زملكاوى ... اسمعلاوى ولا اتحادوى
مش برضه بتحب الكوره زينا
مسلم أو مسيحى
مش برضه انسان زينا
.
لا يهمنى لونك ولا يهمنى عنوانك
يهمنى قلبك ماهو برضه بيدق زى قلبنا
.
كلمــــــــاتى هيا كلماتك
اكيد حسيت بيها أو يمكن لسه هتحس
اكيد نفسك تقولها و حتى نفسك قلب الناس تمس
.
احساسك يهمنا
ماهو انت انسان زينا

وبرضه نورتنا

الأربعاء، 17 سبتمبر 2008

يارب اغنيه للرائع دائما محمد فؤاد




أنا منك وانا ليكى
حياتى وعمرى فى ايديكى
ولاجايز ولايمكن
بحبك حب مش ممكن
حبيبتى شوفى من الأخر
انا واحد بموت فيكى

كلمة بحبك
من القريب من الغريب
ومن غيرى سمعتيها

كلمة بحبك
منى انا من قلبى
بقولها بجد
يابلدى ......يابلدى
يابلدى منى حسيها


ويــــــــــــــــــارب
كل اتنين عالحب حبايب قربهم وماتبعدهمش
كل جيران وصحاب وقرايب جمعهم ماتفرقهمش

والى فى قلبه عذاب او جرح طيبهوله
والى مداقش الهنا والفرح دوقهوله

والى تعبان فى الليالى ليله قصره
والى شايل هم غيره ساعده قدره

والى غريب عن داره الى اختار مشواره
حلى يارب مراره وهون غربته
نور سكته صبر دمعته

ما انت حبيب الكل يارب


..

الثلاثاء، 16 سبتمبر 2008

وحشتنى ......

وحشتنى .......
رغم بكا الليالى الى داقته عينى فى بعدك
وحشتنى
بين كل وجع الفراق نطق قلبى وقال
وحشتنى
.
وحشت عينى الى مشتاقه لعينيك
وحشت ايدى الى مشتاقه لايديك
وحشت قلبى الى دايب فى احساسه بيك
.
وحشتنى
رغم كل دقايق العذاب فى حضن الليل من غيرك
وحشتنى .......
بين سكون الكلام وضياع الأمان فى فراقك
وحشتنى ...........
وحشتنى كلمة حبيبتى لما تحسها عينيا فى وسط الزحام
وحشنى وعدك ليا مع كل همسه من قلب الكلام
.
وحشتنى............
لو اقولك قد ايه
مش هتوصف احساسى
الى مستخبى بين حروف كلمة وحشتنى !!

هنـــــــــا ......


هنا .....
وفى نفس المكان
.
مش برضه كنا متواعدين
مهما فات الزمن وعدت السنين
هنرجع هنا
.
مش قلنا هنروح بعيد ونعيش
ونرجع تانى هنا
..
اتواعدنا يوميها حبنا ماينتهيش
مهما غاب عنا الهوا
والأمان والدفا
برضه هيفضل حبنا
عايش جوانا هنا
...
حتى لو نسينا المكان
ونسينا الناس والذكريات
حبنا هنلاقيه مستخبى
جوا العيون الدايبين
الى من الشوق متغربين
مهما طال عليهم الزمن
.
مش اتواعدنا بكده
زمان فى نفس المكان
هنا .................
.
.

الاثنين، 15 سبتمبر 2008

جمعية حمـــوم الانسان "مش محتاج كلام "


















مش محتاجيــــــن كلام

للصمت صراخ أقوى !!
....
.
" اللهم اكفنا شر قهر الرجـــال "

ياجماعه انتوا فاهمين غلط .....!




ياجماعه انتوا فاهمين غلط

...



أوعوا تكونوا من الناس المعارضين الى فاهمين غلط أوعوا تكونوا من الناس الى بيقولوا الحكومه شريره ووحشه أوعوا تكونوا بتقولوا ان احنا مش عظام وان البلد فيها فساد وان التعليم بايظ وان أنا مثلا فى الكليه مش هلاقى حته أقعد فيها بس لأنى مش فى جامعه خاصه أوعوا تكون من الناس الوحشين بقى الى بيكرهوا الضباط عشان الى بيعملوه فى القسم
تؤتؤ
تؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤتؤ
تؤتؤ
يـــــــــــــــا جماعه انتوا فاهمين غلط
بصوا ياجدعان يعنى لما تشترى كيلو لحمه وتلاقيه بخمسين جنيه مثلا يعنى وده نادرا لما بيحصل (لأنه بيبقى أكتر من كده طبعا) تفتكروا ده ليه أقولكوا أنا يعنى الحق على الحكومه انها مش عايزانا نتعود عليها أصل انتوا مش فاهمين أصل اللحمه فيها بروطين وده الناس بتدمنوا أيون شفتوا دايما كده ظنكوا وحش شفتوا الحكومه أموله ازاى
واحد من الناس الى بعيد عنكوا بيكره الحكومه وشكلوا زكى شويه يقولى طب ما الأغنيه باكلوا لحمه كل يوم وأرد أنا أقولوا بعيدا عن الحقد الطبقى بتاع المصريين ده أن الأغنيه يعنى بياكلوا لحمه بس بيعرفوا يتعالجوا من ادمانها واحد زيكس يقولى ازاى أقولوا ياجماعه انتوا فاكرين الأغنيه دول بياكلوا زينا احنا مثلا لما بنيجى ناكل بناكل بكل حته فينا لكن هما مثلا بياكلوا بشويش فيدوبك يحطوا حته من هنا تلاقى بطنهم لا مؤاخذه اتملت وشبعوا أخر شبعان
كفايه (الكلمه دى ملهاش أى دعوه بأى حاجه من الى فى دماغكوا مش بقلكوا دايما بتسيئوا الظن) حقد بقى حرام عليكوا
*************************
**

نكمل مع بعضينا وجهات نظر الحكومه الى احنا مش فاهمينها يعنى (معلش استحملوا شويه )
نكلم دلوقتى على أمن الدوله
ها..........؟
حسيته بايه لما قلت الكلمه دى
أكيد كل واحد مسك قفاه
معلش عارفه ان سيرة الظباط تقيله على قلبكوا
وان سيرة أمن الدوله والمخبرين أتقل

بس ياجماعه الى انتوا مش فاهمينه ان الظابط ده طيب طيابه مفيش كده
مثلا واحد لسه مقبوض عليه فى قضية بعيد عنكوا أمن دوله يعنى يادوب كده كان بيفكر انه ينظم اضراب
يعنى لسه بيفكر !!!

واحد من الناس الى متربصين بحكومتنا الرشيده يقولى يبقى مفيش دليل هما دخلوا جوه نفوخه يعنى أقولوا وانت عايزهم يسيبوا لغاية مايعمل لامؤاخذه اضراب
ليه هيا سايبه ولا ايه ؟!
ال اضراب ال
وانتوا فاكرين حكومتنا قاعده على ودانها أصلهم بيبانوا بتوع االاضراب دول

ماعلينا.....................!

ده مشهد من أحد الغرف المغلقه(عشان ماحدش يستهوى ياجدعان) فى أمن الدوله
طبعا لازم أول ما النبى حارسه وصاينه المقبوض عليه يدخل على حضرة الظابط
يسأله (انت من أنهى جماعه ياض يابن ...... )
ياجماعه متفهموش غلط " ياض يابن ......." دى عشان الحب خلوا البساط أحمدى بقى
ما انت بتهزر مع صاحبك وبتقوله نفس الحاجات
يعنى هيا حلوه منك ووحشه من عمو الظابووط

المهم .........
الواد المقبوض عليه مخضوض ياعينى
الظابط يولع سيجاره وكان هيعزم عليه بس أنتوا عارفين السجاير مضره بالصحه ده جزاة الراجل يعنى
ينادى الظابط بأعلى صوت جاااااااااااااااابر
جابر يجى واحد كده شبه ضرفة الدولاب ربنا مايوريكوا
المتهم يبص لجابر ويضحك هيهيهيهيهيهيه (مش بيقولوا شر البليه مايضحك )

جابر بقى لازم يديله أحلى واجب وطااااااااااااااااااااااااااااااااااااااااااااااااااااااااخ
أه ياقفايا
ايه ياجماعه مالكوا مش لازم يسلم عليه وطبعا جابر طويل يبقى ايه الى على مستوى نظره قفاه الله لسه هيوطى احنا فاضيين للخنقه دى ولا هما يعنى شغالين عنده لما يعوز يوطى يوطوا معاه
دى ناس معندهاش دم
ماعلينا........................
طبعا الراجل أغمن عليه متخدوش فى بالكوا انتوا أصل الراجل كان ضعيف شويه مش زنب جابر بقى كمان هيغذوه قبل مايسلموا عليه ده حاجه غريبه ياجدع
بعد ما الراجل فاق بقى بجردل ميه ساقعه بلاش دماغكوا ديه
الدنيا كانت حر يعنى درجة الحراره 17 كده يعنى مش حر بزمتكوا
ماعلينا.........................
الراجل باين كان صدره واجعه فراح حضرة الظابط الله يستره
راح مديله سيجاره فى صدره (على أنه طفايه) عشان يدفيه يعنى
وبعدين الكى ده علاج قديم من أيام جد جد الظابط أيون صدقونى
والله راجل أمير أماره ما تتوصفش
وطبعا أنتوا عارفين الكى بيحرر وبعدين الراجل يعنى كان مترب على الاخر تفتكروا نسيوا مترب راح جابر جاب حبة ضرف دولاب تانين بس المره دى دولاب نيج
وراحوا طبعا منفضينه بقى ..........أحم من التراب يعنى
فبس بقى راح الظابط الله يكرمه هو وأبوه راح قال لجابر ياخدوا فى حته يرتاح فيها شويه فجابر طبعا مخبر يعنى
تفتكروا هينيموا فين فى الفور سيزون مثلا
راح وداه على تخشيبه بس ايه فله مفهاش غير جردل مش عارفه ايه لازمته الصراحه
كانوا لازم يعودوا الراجل على الغلب عشان لما يطلع بره
فطبعا بما ان الجو كان حر فملولما الزنزانه ميه كده قال يعنى بيسينى
والله الراجل متروق على أخر ربنا يكرم جابر وأخو جابر وعيلة جابر كلها
وربنا يخربيت الراجل الى كان بيفكر يعمل اضراب
يلا
كل واحد بقى يخلى باله من دماغه
..
.


حسبى الله ونعم الوكيل

......

الاثنين، 1 سبتمبر 2008

رمضــــــــــان كريم



يـــــــــــاه

أخيرا رجعنا نصوم رمضـــــــان تانى

أول يوم مكنتش عارفه انام بعد السحور من كتر الفرحه

رمضـــــــان ده غير

.

رمضـــــان من غير مدارس
" صحيح اخر عشر ايام فيه كليه بس برضه "

نويت اصلى التراويح كل يوم

ربنا يقدرنى ويقوينى

.

ياه

امبارح وانا فى التراويح رغم انى كنت مجهده جدا

وكان الشيطان بيلعب فى دماغى انى ماروحش

بس الحمد لله انى قدرت اقاومه وجريت لبست ونزلت

وحشنى أوى جامعنا وحشتنى أوى روح الحب فى الله بين البشر

تلاقى ناس متعرفهاش تيجى تاخدك بالحضن وتقولك كل سنه وانت طيب

حاجه بتخليك تبقى عايز تفضل فى حضنهم

تحس فى وشهم بنور غير عادى برضا ملائكى برحمه ربانيه بطمع فى المفغره

.

كالعاده صليت فى الدور التالت

حاله من الروحانيه والوجود مع ربنا استمرت من العشا لحد الساعه عشر ونص

مع صوت الشيخ شعبان فى تلاوة القرأن

بحس ان قلبى بيترعش وان واحده واحده بيتطهر

ربنا يكرمه


مستنيه أفطر بقى عايزه أكل قراصييه

وحشتنى القراصييه


يــــــــــارب

اجعل رمضان رحمه للمسلمين وغفرانا لذنوبهم وعتق من النيران وفوزا بالجنه ابعد عنا خطايانا وقربنا منك


يــــــــــارب

ارزقنا حبك وحب من أحبك وحب عمل يقربنا الى حبك


يــــــــــــارب

انصر اخواننا المستضعفين فى العراق وفى فلسطين وفى لبنان وفى كل موقع ومكان

يــــــــــارب

فرج كرب المسلمين و اشفى مرضى المسلمين وارحم موتى المسلمين اللهم اجعل قبورهم روضة من رياض الجنه ولا تجعلها حفر من حفر النار

يـــــــــــارب

اسألك بكل اسم سميت به نفسك أو انزلته فى كتابك او علمته احد من خلقك او استأثرت به فى علم الغيب عندك ان تجعل القرأن ربيع قلوبنا ونور صدورنا وجلاء حزننا وذهاب همومنا

يـــــــــــــارب

اللهم لا تجعل لنا ذنبا الا غفرته ولا عيبا الا سترته ولا ذنبا الا فرجته

اللهم استجب

اللهم استجب

اللهم استجب